屋外斜坡維修　點解要業主出錢？

「呢度裝修靚，交通方便，唔錯呀。」陪朋友睇樓，大家只着眼室內，只有Isabel望向窗外。

「叫你睇樓，又一味掛住睇風景！」

唔係呀，我見出面咁大幅斜坡，諗緊你買呢度之後使唔使夾錢維修。

Isabel指住窗外話。當下無人理佢，但呢番話就點醒作為樓市新丁嘅我，原來我過去一直睇漏呢樣嘢。

千祈唔好睇少斜坡維修費用。翻查新聞，中環有幅3米幾高、7米長嘅小斜坡，因收到屋宇署嘅危險斜坡修葺令，搞到隔離幢唐樓業主要花近百萬維修，每戶夾成10萬蚊。當然，維修費視乎斜坡狀況，未必次次都要大修，但定期保養、修補裂痕等使費一定走唔甩。

不過，又唔使一見到斜坡就驚咗，最緊要搞清維修責任誰屬。點先知道？Isabel教咗我一個方法，上網登入地政總署「斜坡維修責任信息系統」就一清二楚。

舉例我想知大埔寶馬山嘅維修責任，喺地址一欄輸入屋苑名，地圖顯示屋苑被兩幅斜坡包圍，用紅色框住，代表斜坡屬私人擁有（藍色則為政府負責）。

根據資料，「負責地段/負責方」為大埔市地段第137號，轉做英文介面睇，編號為TPTL137；然後出去上一頁搜尋呢個地段編號，原來就係指大埔寶馬山，換言之，屋苑需承擔斜坡維修。

全文刊於《晴報》

《晴報》facebook